ប្រទេសវៀតណាម៖ កាលពីថ្ងៃទី១៦ ខែមករា ឆ្នាំ២០២៥ ឯកឧត្តម ឧត្តមសេនីយ៍ឯក ថោង ថាវរិន្ទ មេបញ្ជាការរងកងទ័ពជើងគោក បានដឹកនាំគណៈប្រតិភូ កងទ័ពជើងគោក ជួបសម្តែងការគួរសម និងជូនពរឆ្នាំថ្មីប្រពៃណីជនជាតិវៀតណាមដល់ បញ្ជាការដ្ឋានយោធភូមិភាគទី ៩ នៃកងទ័ពប្រជាជនវៀតណាម, គណៈកម្មាធិការប្រជាជនទីក្រុងកឹនថី និងមន្ទីពេទ្យពហុជំនាញហ្វាហាវ មេឌិច កឹនថី ។
គណៈប្រតិភូ កងទ័ពជើងគោក ត្រូវបានទទួលស្វាគមន៍យ៉ាងកក់ក្តៅពីសំណាក់ ឧត្តមសេនីយ៍ត្រី ង្វៀន វ៉ាន់ទៀន មេបញ្ជាការរង យោធភូមិភាគទី៩ លោក ង្វៀន ង៉ុក ហែ ( Nguyên Ngoc He) អនុប្រធានគណៈកម្មាធិការប្រជាជនទីក្រុងកឹនថឺ; ឧត្តមសេនីយ៍ត្រី វូ កៅគន់ ( Vu Cao Quan) សមាជិកក្រុមប្រឹក្សាភិបាលមន្ទីពេទ្យ ហ្វាហាវ មេឌិច កឹនថឺ ។
ជំនួសមុខឲ្យឯកឧត្តម នាយឧត្តមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ឯកឧត្តម ថោង ថាវរិន្ទ បានពាំនាំមកនូវការផ្តាំផ្ញើរ និងសាកសួរសុខទុក្ខជូនពរឆ្នាំថ្មី ប្រពៃណីជនជាតិវៀតណាមពីសំណាក់ ឯកឧត្តម មេបញ្ជាការ ព្រមទាំងថ្នាក់ដឹកនាំ នាយទាហាន នាយទាហានរង និងពលទាហានទូទាំងបញ្ជាការដ្ឋានកងទ័ពជើងគោក នូវមនោសញ្ចេតនាសប្បាយរីករាយ អំណរសាទរយ៉ាង ក្លៀវក្លា នាំមកនូវសិរីសួស្តី ជ័យមង្គលគ្រប់ប្រការជូនចំពោះ ឯកឧត្តម មេបញ្ជាការយោធភូមិភាគទី៩ និង លោកជំទាវ ; លោកអនុប្រធានគណៈកម្មាធិការប្រជាជនទីក្រុងកឹនថឺ; ឧត្តមសេនីយ៍ត្រី វូ កៅគន់ និងលោកជំទាវ ថ្នាក់ដឹកនាំកម្មាភិបាល យុទ្ធជន យុទ្ធនារី ព្រមទាំងក្រុមគ្រួសារ ទាំងអស់ទូទាំងកងទ័ពប្រជាជនវៀតណាម ដែលជាបងប្អូនជាប់ភូមិផងរបងជាមួយគ្នា នាំមកនូវសេចក្តីសុខ សេចក្តីចំរើនរុងរឿង និងជោគជ័យគ្រប់ការងារគ្រប់ភារកិច្ច ។
ជាការឆ្លើយតប របស់ ឧត្តមសេនីយ៍ត្រី ង្វៀន វ៉ាន់ទៀនន ជំនួសមុខឱ្យថ្នាក់ដឹកនាំយោធភូមិភាគទី៩ ; លោក ង្វៀន ង៉ុក ហែ ជំនួសមុខឱ្យថ្នាក់ដឹកនាំគណៈកម្មាធិការប្រជាជនទីក្រុងកឹនថឺ ឧត្តមសេនីយ៍ត្រី វូ កៅគន់ ជំនួសមុខឱ្យថ្នាក់ដឹកនាំ នៃមន្ទីពេទ្យ ហ្វាហាវ មេឌិច កឹនថឺ សូមអគុណដល់បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ដែលជាដៃគូកិច្ចសហប្រតិបត្តិការជាមួយគ្នាជាយូរមកហើយ បានអញ្ជើញមកសាក សួរសុខទុក្ខ និងជូនពរឆ្នាំថ្មីនាពេលនេះ ។
ជំនួបសម្តែងការគួរសម ពិភាក្សាការងារ និងជូនពរឆ្នាំថ្មីប្រពៃណីជនជាតិវៀតណាម ប្រកបដោយភាពរាក់ទាក់និងសួរសុខទុក្ខដល់គ្នាទៅវិញទៅមក ភាគីទាំងពីរក៏បានសម្តែងនូវមោទនភាព ចំពោះការ រីកចម្រើន នៃទំនាក់ទំនងចំណងការទូត និងកិច្ចសហប្រតិបត្តិការរវាងប្រទេស ប្រជាជន និងកងទ័ពទាំងពីរ ស្របតាមពាក្យស្លោក “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និង ស្ថិរភាពយូរអង្វែង ៕
