លោកអ៊ុន​ ចាន់ដា​ អភិបាលខេត្តកំពង់ចាម ដឹកនាំមន្ត្រីរាជការ គោរព​វិញ្ញាណខន្ធ ព្រះបរមរតនកោដ្ឋ គម្រប់ខួប៧ឆ្នាំ​

កំពង់ចាម​៖ ដោយទឹកចិត្តគោរព ស្រឡាញ់ និងតបស្នងនូវគុណ បុព្វការៈដ៏ធំធេងរបស់អង្គព្រះមហាវីរក្សត្រ ព្រះវររាជ បីតាឯករាជ្យ មរណភាពទឹកដី និងឯកភាពជាតិខ្មែរ នៅព្រឹកថ្ងៃទី ១៥ ខែតុលា ឆ្នាំ២០១៩នេះ លោក​ អ៊ុន​ ចាន់ដា​ អភិបាល​នៃ​គណៈ​អភិបាល​ខេត្តកំពង់ចាម​ និង​លោក​​ ខ្លូត​ ផន​ ប្រធាន​ក្រុម​ព្រឹក្សា​ខេត្ត​ បានដឹកនាំមន្ត្រី​រាជការ​មន្ទីរ​អង្គភាព​ពាក់ព័ន្ធ​ជុំវិញខេត្ត​ អញ្ជើញចូលរួមពិធីគោរពព្រះ វិញ្ញាណខន្ធព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ គម្រប់ខួប៧ឆ្នាំ នៅសាលា​ខេត្ត​កំពង់ចាម​។ ​

ដេីម្បី​ប្រារព្ធ​ពិធី​នេះ​ លោក​​ អ៊ុន​ ចាន់ដា​ តាំង​នាមឲ្យ​ថ្នាក់ដឹកនាំ​មន្ត្រី​រាជការ​ និង​ប្រជាពលរដ្ឋក្នុង​ខេត្ត​កំពង់ចាម​ លោក​​ក៏​បានសម្តែងនូវព្រះរាជមរណទុក្ខយ៉ាងក្រៀមក្រំបំផុត ចំពោះការយាងចូលទិវង្គតរបស់សម្តេចតា សម្តេចតាទួត ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាជាតិឯករាជ្យ និងបង្រួបបង្រួមជាតិខ្មែរ។​

ជា​មួយ​គ្នា​នោះ​ ឯកឧត្តម​អភិបាលខេត្ត​ បាន​ថ្លែង​រំឮក​នូវរាល់ស្នាព្រះហស្ថ ព្រះរាជបូជនីយកិច្ច និងគុណបុព្វការៈដ៏ធំធេងរបស់ព្រះអង្គ ដែលបានលះបង់ព្រះកាយពល ព្រះបញ្ញាញាណ ដើម្បីមរណភាពទឹកដីកម្ពុជា។​

ចំពោះ​ខ្សែភាពយន្តឯកសារស្តីពីព្រះរាជសកម្មភាពរបស់ព្រះករុណាព្រះបាទសម្តេច ព្រះនរោត្តម​ សីហនុ ព្រះមហាវីរក្សត្រ ព្រះវររាជបិតា ឯករាជ្យ មរណភាពទឹកដី និងឯកភាពជាតិខ្មែរ ” ព្រះបរមរតនកោដ្ឋ ” ជាច្រើន ត្រូវបានចាក់ផ្សាយ រំឭកឡើងវិញទៅដល់ព្រះរាជគុណបុព្វការៈរបស់ព្រះអង្គ ដែលបានលះបង់កាលពីអតីតកាល ។

ខេត្តកំពង់ចាមរបស់យើង កាលណាគេនិយាយដល់វិទ្យាល័យធំជាងគេជំនាន់នោះ គេនឹងនឹកឃើញទៅដល់វិទ្យាល័យព្រះសីហនុ ខេត្តកំពង់ចាម !
កាលណាគេនិយាយទៅដល់រោងចក្រតម្បាញដែលធំជាងគេជំនាន់នោះ​ គេនឹងនឹកឃើញទៅដល់រោងចក្រតម្បាញវាយនភ័ណ្ឌកំពង់ចាម! អតីតសាលាបច្ចេកទេស សព្វថ្ងៃបានប្រែក្លាយជាសាលា និងមជ្ឈមណ្ឌលគរុកោសទៅហើយ! ទាំងអស់នេះ គឺជាសមិទ្ធផលបានកើតឡើងក្នុងជំនាន់ព្រះករុណាព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ” ព្រះបរមរតនកោដ្ឋ – ដឹកនាំ !
ថ្ងៃនេះប្រជានុរាស្ត្រទូទាំងព្រះនគរកំពុងរស់នៅក្រោមដំបូលនៃសុខសន្តិភាព និងការអភិវឌ្ឍ ក្រោមម្លប់ដ៏ត្រជាក់នៃអង្គព្រះមហាក្សត្រជំនាន់ថ្មី គឺព្រះករុណា
ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជណាចក្រកម្ពុជា និងក្រោមការដឹកនាំរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ​ ហ៊ុន សែន ជាប្រមុខ។ សូមដួងព្រះវិញ្ញាណក្ខ័ន្ធព្រះករុណាព្រះបាទសម្តេច ព្រះនរោត្តម​ សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ” ព្រះបរមរតនកោដ្ឋ * ស្ងប់ព្រះរាជហឫទ័យចុះ ថាកូនចៅជំនាន់ក្រោយកំពុងខិតខំបំពេញភារកិច្ចបន្តនៅលើវិថីដែលព្រះអង្គបានត្រួសត្រាយកន្លងមក។
គួរ​បញ្ជាក់ថា ព្រះបរមរតនកោដ្ឋ ព្រះករុណា ព្រះបាទ សម្តេចព្រះនរោត្តម សីហនុ ព្រះមហាវីរក្សត្រខ្មែរ បានយាងសោយទិវង្គតដោយព្រះជរាពាធ កាលពីថ្ងៃទី១៥ ខែតុលា ឆ្នាំ២០១២ នៅវេលាម៉ោង ១ និង២០នាទីរំលងអាធ្រាត្រ (ម៉ោងនៅកម្ពុជា) នៅឯមន្ទីរពេទ្យ នាទីក្រុងប៉េកាំង ប្រទេសចិន ។ ព្រះបរមសពរបស់ព្រះអង្គបានដង្ហែមកដល់រាជធានីភ្នំពេញ នៅថ្ងៃទី១៧ ខែតុលា ឆ្នាំ២០១២ និងបានតម្កល់រយៈពេល ៩០ថ្ងៃ នៅក្នុងព្រះបរមរាជវាំង ដើម្បីឲ្យព្រះរាជវង្សានុវង្ស មន្រ្តីរាជការ ប្រជារាស្រ្ត មន្រ្តីអង្គទូត ព្រមទាំងមេដឹកនាំបណ្តាប្រទេសជាមិត្ត ចូលសម្តែងព្រះរាជមរណទុក្ខ និងគោរពព្រះវិញ្ញាណក្ខន្ធ៕ដោយលោកប៉ែន ឡា