ចេញពី​ពន្ធនាគារប្រកបមុខរបរដដែលត្រូវសមត្ថកិច្ចបង្ក្រាបបាន!

ឧ​ត្ត​រ​មានជ័យ​ ៖​កម្លាំង​ប៉ុស្តិ៍​នគរបាល​រដ្ឋបាល​អូរ​ស្មាច់ ចំនួន​០៤​នាក់ ដឹកនាំ​ដោយ លោក​អនុសេនីយ៍ឯក ជ័យ វាសនា នាយ​ប៉ុស្តិ៍ បាន​ចុះ​ធ្វើការ​ស៊ើបអង្កេត និង​ត្រួតពិនិត្យ​បង្ក្រាបបានជនសង្ស័យម្នាក់ករណី​ចែកចាយ​សារធាតុ​ញៀន​ខុសច្បាប់ កាលពី​វេលា​ម៉ោង​០៨​និង​៥៥​នាទី ថ្ងៃទី​១៦ ខែ​កក្កដា ឆ្នាំ​២០១៩ ចំណុច ភូមិអភិវឌ្ឍន៍ សង្កាត់​អូរ​ស្មាច់ ក្រុង​សំរោង ខេត្ត​ឧ​ត្ត​រ​មានជ័យ។​

ប្រភពពីសមត្ថកិច្ចបានអោយដឹងថាជនសង្ស័យម្នាក់ជាស្ត្រី​ មានឈ្មោះ ញឹម ងិះ ភេទ​ស្រី អាយុ ៣៩​ឆ្នាំ ​ រស់នៅ​ភូមិ​អភិវឌ្ឍន៍ សង្កាត់​អូរ​ស្មាច់ ក្រុង​សំរោង ខេត្ត​ឧ​ត្ត​រ​មានជ័យ​ ជនសង្ស័យជាមុខសញ្ញា​ចេញពី​ពន្ធនាគារ ហេីយចែកចាយ​សារធាតុ​ញៀនត្រូវ​បាន​​​​​​​ភ្នាក់ងារ​សម្ងាត់​​រាយការណ៍​ថា​ ​សង្ស័យ​នៅតែបន្តលាក់​ទុក​សារធាតុ​ញៀន។

​សម្ភារៈដកហូតបានរួមមាន សារធាតុ​ញៀន ប្រភេទ​មេ​តំ​ហ្វេ​តា​មីន​គ្រាប់ ពណ៌​ផ្កាឈូក ចំនួន​២០០​គ្រាប់ ប្រភេទ​មេ​តំ​ហ្វេ​តា​មីន​ICE (​ម៉ា​ទឹកកក​) ចំនួន​៦​កញ្ចប់​ធំ និង​១​កញ្ចប់​តូច ព្រមទាំង​សម្ភារៈ​វេច​ខ្ចប់​គ្រឿងញៀន​មួយចំនួនទៀត។​

បច្ចុប្បន្ន ជនសង្ស័យ រួម​នឹង​វត្ថុតាង​ខាងលើ ​ត្រូវបាន​នាំមក​កាន់​អធិការដ្ឋាន​នគរបាល​ក្រុង​សំរោង ដើម្បី​សាកសួរ និង​កសាង​សំណុំរឿង​តាម​នីតិ​វិធី​៕ដោយលោក ប៉ែន ឡា